Ente Malayalam News

Follow Us

Showing posts with label Life. Show all posts
Showing posts with label Life. Show all posts

Wednesday, 14 February 2018

അറിയാമോ പ്രണയത്തിന്റെ രസതന്ത്രം ?

Designed by Freepik

ഒരു ദിവസം മാത്രം ആഘോഷിക്കേണ്ടതാണോ പ്രണയം? ഫെബ്രുവരി പതിനാലിനാണ് പൊതുവെ പ്രണയത്തെക്കുറിച്ച് വാചാലരാകുന്നത്. പ്രണയം മനസ്സില്‍ മൊട്ടിട്ടു കഴിഞ്ഞാല്‍ നമ്മുടെ ശരീരത്തു എന്തെല്ലാം മാറ്റങ്ങൾ വരുന്നു. ഇൻഫോക്ലിനിക്കിലൂടെ ഡോ. മനോജ് വെള്ളനാട്‌ എഴുതുന്നു....

പ്രണയത്തിന്റെ രസതന്ത്രം

മനസ്സില്‍ പ്രണയം മൊട്ടിട്ടുകഴിഞ്ഞാല്‍ പിന്നെ ആകെയൊരു പരവേശമാണ്. സംസാരിക്കുമ്പോള്‍ ശബ്ദമിടറുന്നു. കാലുകള്‍ക്ക് വിറയല്‍ ബാധിക്കുന്നു. ശബ്ദം നേര്‍ത്തുപോകുന്നു. നെഞ്ചിടിപ്പ് സ്വയമറിയുന്നു. ടെന്‍ഷന്‍. ഉത്കണ്ഠ. ഒരാള്‍ കാമുകനോ കാമുകിയോ ആയിക്കഴിയുമ്പോള്‍ സംഭവിക്കുന്ന ജൈവസവിശേഷതകളാണിവയൊക്കെ. ബാല്യത്തില്‍ നിന്നും കൗമാരത്തിലേക്ക് കടക്കുമ്പോഴാണല്ലോ ഇത്തരം സ്വഭാവസവിശേഷതകൾ ആദ്യമായി സംഭവിക്കുന്നത്. അത് സ്വാഭാവികമാണ്.

പ്യൂപ്പക്കുള്ളില്‍ നിന്നും ഹോര്‍മോണുകളുടെ ചിത്രശലഭങ്ങള്‍ കൂട്ടത്തോടെ പുറത്തുചാടുന്ന “ഹോര്‍മോണ്‍ വസന്തകാല"മാണ് കൗമാരം. ഈ ഹോര്‍മോണുകളും നാഡീവ്യൂഹത്തിലെ “പോസ്റ്റ്‌മാന്‍" മാരായ ന്യൂറോട്രാന്‍സ്മിറ്റേഴ്സും അവരുടെ സഹായികളായ ചില രാസസംയുക്തങ്ങളും ചേര്‍ന്നാണ് പ്രണയം സൃഷ്ടിക്കുന്നത്. തലച്ചോറാണ് പ്രണയത്തിന്‍റെ കേന്ദ്രമെന്നത് തെളിയിക്കപ്പെട്ടിട്ടുള്ളതാണ്. ഹൈപോതലാമസാണ് പ്രണയത്തിന്‍റെ ഉത്തേജനകേന്ദ്രം. പ്രണയത്തിന്‍റെ ജൈവഘടകങ്ങളായ സ്പര്‍ശം, കാഴ്ച, ഗന്ധം, കേള്‍വി തുടങ്ങിയവയുമായി ബന്ധപ്പെട്ട തലച്ചോറിന്‍റെ ഭാഗങ്ങള്‍ ഹൈപോതലാമാസുമായി ആശയസംവാദത്തില്‍ ഏര്‍പ്പെടുകയും പ്രണയം പോലുള്ള നിര്‍മ്മലവികാരങ്ങള്‍ ജനിപ്പിക്കുകയും ചെയ്യുന്നു.

പ്രണയ ഹോര്‍മോണുകള്‍

ഒരാൾ കൗമാരത്തിലേക്ക് കടക്കുമ്പോള്‍, പ്രണയത്തിന്‍റെ അപ്പോസ്തലനായ ഹൈപോതലാമസ് ഗൊണാഡോട്രോപ്പിന്‍ റിലീസിംഗ് ഹോർമോൺ (GRH) എന്ന ഹോര്‍മോണ്‍ ഉത്പാദിപ്പിക്കും. ഇത് തലച്ചോറിന്‍റെ തന്നെ ഭാഗമായ പീയുഷഗ്രന്ധിയെ (PITUITARY GLAND) ഉത്തേജിപ്പിച്ചു ഫോളിക്കുലാര്‍ സ്റ്റിമുലേറ്റിംഗ് ഹോര്‍മോണും (FSH) ല്യൂട്ടിനൈസിംഗ് ഹോര്‍മോണും (LH) പുറപ്പെടുവിക്കും. ഇവ ആണ്‍കുട്ടികളുടെ വൃഷണങ്ങളില്‍ ചെന്ന് ടെസ്റ്റോസ്റ്റിറോണ്‍ എന്ന പുരുഷഹോര്‍മോണും പുംബീജവും ഉണ്ടാകാന്‍ സഹായിക്കും. പെണ്‍കുട്ടികളുടെ അണ്ടാശയങ്ങളില്‍ ചെന്ന് അണ്ഡവും ഈസ്ട്രജന്‍, പ്രൊജസ്റ്റിറോണ്‍ തുടങ്ങിയ ഹോര്‍മോണുകളും ഉത്പാദിപ്പിക്കും. ഈ അവസാനം പറഞ്ഞ മൂന്നുഹോര്‍മോണുകളാണ് കൗമാരകാല പ്രണയങ്ങള്‍ക്കും പ്രണയചാപല്യങ്ങള്‍ക്കും കാരണം. ഓക്സിട്ടോസിന്‍, വാസോപ്രെസ്സിന്‍ എന്നൊക്കെ പറയുന്ന പ്രണയസഹായികളും ഹോര്‍മോണുകളുടെ കൂട്ടത്തില്‍ ഉണ്ട്. കൂടാതെ പ്രണയത്തിന്‍റെ വിസ്മയലോകത്തേക്ക് പ്രവേശിച്ചവരുടെ രക്തത്തില്‍ കോര്‍ട്ടിസോള്‍ എന്ന ഹോര്‍മോണിന്‍റെ അളവും കൂടുതലായി കണ്ടെത്തിയിട്ടുണ്ട്.

പ്രണയത്തിന്‍റെ നാഡീരസങ്ങള്‍

നാഡീരസങ്ങള്‍ എന്നാല്‍ ഞരമ്പുകള്‍ക്കിടയില്‍ വിവരങ്ങള്‍ കൈമാറ്റം ചെയ്യാനും അതുവഴി ഒരാളുടെ ചിന്തകള്‍, പെരുമാറ്റം, ശരീരഭാഷ, വിശപ്പ്, കാമം തുടങ്ങി നൂറായിരം കാര്യങ്ങളുടെ ഗതിവിഗതികൾ കൈകാര്യം ചെയ്യുന്ന രാസവസ്തുക്കളാണ്. നേരത്തെ സൂചിപ്പിച്ച ന്യൂറോട്രാന്‍സ്മിറ്റേഴ്സ് ഇക്കൂട്ടത്തില്‍ പെടുന്നതാണ്. ശരിക്കും പറഞ്ഞാല്‍ ഈ നാഡീരസങ്ങളാണ് ഒരാളെ പ്രണയിതാവാക്കുന്നത്. ഹോര്‍മോണുകള്‍ അതിനുള്ള പശ്ചാത്തലം ഒരുക്കുകയാണ് ചെയ്യുന്നത്. നമുക്കൊരാളോട് ഇഷ്ടം തോന്നുന്ന നിമിഷം മുതലുള്ള പ്രണയസംബന്ധിയായ സകലമാനചെയ്തികള്‍ക്കും ഉത്തരവാദി ഈ നാഡീരസങ്ങളാണ്. ഒരാളോട് തോന്നുന്ന ആകര്‍ഷണം മുതല്‍ പ്രണയത്തിന്‍റെ പാര്‍ശ്വഫലങ്ങളായ വിശപ്പില്ലായ്മ, വിറയല്‍, ഉത്കണ്ഠ, ഉറക്കമില്ലായ്മ തുടങ്ങിയവയ്ക്കൊക്കെയും കാരണം ഇവർ തന്നെ.

പ്രണയത്തിന്‍റെ ജീവശാസ്ത്രം പറയുമ്പോള്‍ മൂന്ന് തലങ്ങളായാണ് പ്രധാനമായും ഇതിനെ വ്യാഖ്യാനിക്കാറ്.
  • പങ്കാളിയെ കണ്ടെത്തല്‍ (PARTNER PREFERENCE)
  • സ്നേഹം/മമത (ATTACHMENT)
  • ലൈംഗിക വിചാരങ്ങള്‍ (SEX DRIVE)
കാലക്രമേണ ഒരാളിലെ തന്നെ പ്രണയത്തിന് സംഭവിക്കുന്ന സ്വാഭാവികമായ പരിണാമത്തെയും ശാസ്ത്രം 3 തലങ്ങളിലാണ് നോക്കിക്കാണാറ്.
  • Lust (ഇന്ദ്രിയാഭിനിവേശം)
  • Attraction (വശ്യത)
  • Attachment (മമത) 
 ഇങ്ങനെ ഏതുവിധത്തിൽ വർഗ്ഗീകരിച്ചാലും നിർവചിക്കാൻ ശ്രമിച്ചാലും ഏതൊരു നിർവചനങ്ങൾക്കും ശാസ്ത്രത്തിനുമപ്പുറമാണ്, പ്രണയമെന്ന വികാരം. എന്നാലും അതിനുപിന്നിലും ജീവശാസ്ത്രപരമായ പല രസതന്ത്രസമവാക്യങ്ങളും ഒളിഞ്ഞുകിടപ്പുണ്ട്. അതൊക്കെ കുറേയേറെ നമ്മൾ മനസിലാക്കിയിട്ടുമുണ്ട്. പ്രണയം, മനോഹരമായ ഒരു പെയിന്റിംഗാണെങ്കിൽ അത് വരയ്ക്കാനുള്ള ക്യാൻവാസ് ഒരുക്കുകയാണ് മുകളിൽ പറഞ്ഞ പ്രണയഹോർമോണുകൾ ചെയ്യുന്നതെന്ന് ഇപ്പോൾ നമുക്കറിയാം. ആ ചിത്രം വരയ്ക്കാനുള്ള വിവിധ വർണ്ണങ്ങളാകുന്നത് ഇനിപ്പറയുന്ന പ്രണയത്തിന്റെ നാഡീരസങ്ങളാണ്. തലച്ചോറിലെ ഡോപ്പമിന്‍ എന്ന് പറയുന്ന നാഡീരസമാണ് ഈ കാര്യങ്ങളെയൊക്കെ കൃത്യമായി കൈകാര്യം ചെയ്യുന്നത്. ചിലര്‍ക്ക് ചിലതരം ആള്‍ക്കാരോട് മാത്രമേ പ്രണയം തോന്നാറുള്ളൂ.

അതിനുകാരണം ഈ ഡോപ്പമിനാണ്. അതുപോലെ ഡോപ്പമിനും ഒപ്പം വാസോപ്രെസ്സിനും ഹൈപോതലാമസ്സില്‍ പ്രവര്‍ത്തിക്കുന്നതിന്‍റെ ഫലമായാണ്‌ നമുക്കൊരാളോട് സ്നേഹമോ ഇഷ്ടമോ ആകര്‍ഷണമോ ഒക്കെ തോന്നുന്നത്. ഇതേ ഡോപ്പമിന്‍ തലച്ചോറിന്‍റെ ലിംബിക് സിസ്റ്റം എന്ന് പറയുന്ന ഭാഗത്തെ ഉത്തേജിപ്പിക്കുന്നതിന്‍റെ ഫലമാണ് ലൈംഗികചോദനകള്‍. ഡോപ്പമിന്‍റെ അളവും പ്രവര്‍ത്തനക്ഷമതയും ഓരോ വ്യക്തിയിലും വ്യത്യസ്തമായിരിക്കും. അതുകൊണ്ടാണ് പ്രണയം ഓരോ വ്യക്തിയിലും ഓരോ രീതിയില്‍ സംഭവിക്കുന്നത്. അതുപോലെ ഫിനൈല്‍ ഈഥൈല്‍ അമീന്‍ (Phenylethylamine, PEA) എന്ന മറ്റൊരു നാഡീരസത്തിനും പ്രണയത്തില്‍ നിര്‍ണ്ണായകമായ പങ്കുണ്ട്.

അതിന് ശരീരത്തിന് ഉണര്‍വ്വും ഉന്മേഷവും നല്‍കാനുള്ള കഴിവുണ്ട്. പ്രണയിതാക്കളുടെ വൈകാരികമായ ഇഴയടുപ്പത്തെ നിർണയിക്കുന്നത് ഈ കുഞ്ഞു രാസസംയുക്തമാണ്. ഒരാളുടെ തലച്ചോറില്‍ എത്രത്തോളം കൂടുതല്‍ PEA ഉല്‍പ്പാദിപ്പിക്കപ്പെടുന്നുവോ, അത്രത്തോളം അയാള്‍ സ്വന്തം പ്രണയത്തോട് വൈകാരികമായി അടുത്തിരിക്കും. അതുകൊണ്ടു തന്നെ ചിലരതിനെ MOLECULE OF LOVE അഥവാ 'പ്രണയതന്മാത്ര' എന്നും വിളിക്കാറുണ്ട്. PEA-യ്ക്കു മറ്റൊരു പ്രത്യേകത കൂടിയുണ്ട്.

ഒരു മയക്കുമരുന്നിനോടോ മദ്യത്തോടോ എന്നപോലെ ആസക്തി (Addiction) ഉണ്ടാക്കാന്‍ കഴിവുണ്ടതിന്. എന്നുവച്ചാല്‍ ഈ പ്രണയിക്കുന്നവരുടെ ജീവിതത്തിന്‍റെ നിലനില്‍പ്പ് തന്നെ ഈ രാസവസ്തുവിൽ അല്ലെങ്കില്‍ അത് പുറപ്പെടുവിക്കാന്‍ കാരണമായ സ്രോതസ്സില്‍ അധിഷ്ടിതമാണെന്ന് തോന്നിപ്പോവും. ആ സ്രോതസ്സിവിടെ കാമുകനോ കാമുകിയോ ആകുമെന്ന് മാത്രം. പ്രിയപ്പെട്ട ആളെ കാണുന്നതോ ഒന്ന് തൊടുന്നതോ പോലും ഈ കെമിക്കല്‍ രക്തത്തിലേക്ക് ഒഴുകാന്‍ കാരണമാകും. നമ്മള്‍ പങ്കാളിയുടെ സാന്നിധ്യം ആഗ്രഹിക്കുന്നതും, കാണാത്തപ്പോള്‍ 'മിസ്‌' ചെയ്യുന്നതും വിരഹവേദന തോന്നുന്നതുമൊക്കെ ഈ PEA യുടെ അളവിലുണ്ടാകുന്ന വ്യതിയാനം കാരണമാണ്.

ഏതെങ്കിലും ലഹരിയോടു ആസക്തിയുള്ളവരില്‍ അത് കിട്ടാതെ വരുമ്പോള്‍ ഉണ്ടാകുന്ന WITHDRAWAL SYMPTOMS ഇല്ലേ, അതുപോലെ PEA ആവശ്യത്തിനു കിട്ടാതെ വരുമ്പോഴുണ്ടാകുന്ന withdrawal symptom ആണ് വിരഹം. പ്രണയശാസ്ത്രത്തില്‍ അതിനെ SEPARATION ANXIETY എന്ന് പറയും. ഡോപ്പമിനും PEA യും കൂടാതെയും ചിലരുണ്ട്. പ്രണയത്തിന്‍റെ പാര്‍ശ്വഫലങ്ങളായ ടെന്‍ഷന്‍, ശ്രദ്ധക്കുറവ്, വിശപ്പില്ലായ്മ, ഉറക്കമില്ലായ്മ തുടങ്ങിയവയ്ക്കൊക്കെ കാരണം സെറോട്ടോണിന്‍, എപിനെഫ്രിന്‍, നോര്‍-എപിനെഫ്രിന്‍, അസറ്റൈല്‍ കോളിന്‍ തുടങ്ങിയ നാഡീരസങ്ങളുടെ അളവിലും പ്രവർത്തനത്തിലും ഉണ്ടാകുന്ന വ്യതിയാനങ്ങളാണ്. PEA യ്ക്കും ഡോപമിനും മേൽപ്പറഞ്ഞവയുടെ ഉത്പാദനത്തിൽ നിർണായക സ്വാധീനമുണ്ട്.

ഇങ്ങനെയൊക്കെ പ്രണയിച്ചു നടന്നു, മൂന്നാലു വര്‍ഷം കഴിയുമ്പോള്‍ നമുക്കതിലുള്ള ത്രില്‍ പോകും, അല്ലേ? "മുമ്പൊക്കെ എന്തായിരുന്നു? നീയിപ്പോ ആ പഴയ ആളേ അല്ല, ഒരുപാടങ്ങ് മാറിപ്പോയി" എന്നൊക്കെ പരസ്പരം പരാതിപ്പെടാന്‍ തുടങ്ങും. മോളൂ, ചക്കരേ, തേനേ, ഡാർലിംഗ് എന്നൊക്കെ വിളിച്ചിരുന്നവർക്ക് ഇപ്പോഴങ്ങനെ വിളിക്കുമ്പോൾ ഒരു ജാള്യത പോലും തോന്നും. എന്തൊരുമാറ്റം അല്ലേ? ശരിക്കും മാറിയത് ആ ആളല്ലാ, അയാളുടെ തലച്ചോറിലെ PEA യുടെയും ഡോപ്പമിന്‍റെയും അളവുകളാണ്. ഇവരുടെയൊക്കെ പ്രതാപകാലം (period of dominance) കഴിയുന്നതുകൊണ്ടാണങ്ങനെ തോന്നുന്നത്. ഇപ്പോള്‍ പരസ്പരമുള്ളതും ചുറ്റുപാടുകളുടെയുമൊക്കെ വിലയിരുത്തല്‍ കൂടുതല്‍ വസ്തുനിഷ്ഠമാകുന്നു. യുക്തിസഹമാകുന്നു. കാരണം, നിങ്ങളുടെ കണ്ണുകളെ അന്ധമാക്കിയിരുന്ന കെമിക്കലുകള്‍ പണിനിര്‍ത്തി പിന്‍വാങ്ങിത്തുടങ്ങി. ആരംഭത്തിലുണ്ടായിരുന്ന ത്രില്ലും ആവേശവുമൊക്കെ കെട്ടടങ്ങാന്‍ തുടങ്ങുന്നു.

അപ്പോപ്പിന്നെ എത്രയോ കാലമായി സന്തുഷ്ടമായ പ്രണയ-ദാമ്പത്യജീവിതം നയിക്കുന്ന എത്രയെത്ര പേരെ നമുക്കറിയാം, അവരുടെ കാര്യമോ? എന്നൊക്കെയുള്ള ചിന്തകൾ ഇതുവായിച്ച പലർക്കും ഉണ്ടായിട്ടുണ്ടാകും. അതിനുള്ള ഉത്തരം, ഓക്സിറ്റോസിന്‍, വാസോപ്രെസ്സിന്‍, എന്‍ഡോര്‍ഫീന്‍ എന്നിങ്ങനെയുള്ള കെമിക്കല്‍സ് ചേര്‍ന്ന് നൽകും. ആലിംഗനത്തിന്റെ ഹോര്‍മോണ്‍ (Cuddling hormone) എന്നറിയപ്പെടുന്ന രാസവസ്തുവാണ് ഈ ഓക്സിറ്റോസിന്‍. ഓക്സിറ്റോസിന്‍, വാസോപ്രെസ്സിന്‍, എന്‍ഡോര്‍ഫീന്‍ എന്നിവ നമുക്ക് സ്പര്‍ശനത്തോട് സംവേദനം കൂടുതൽ ഉണ്ടാക്കുകയും സ്നേഹപൂര്‍ണമായ ശാരീരിക ഇടപെടലുകള്‍ക്ക് സുഖമുണ്ടാക്കുകയും ചെയ്യുന്നു.

രതിമൂര്‍ഛ അനുഭവിക്കുന്ന വേളയിലും സ്ത്രീകളിലാണെങ്കിൽ പ്രസവസമയത്തും മുലയൂട്ടുന്ന സമയത്തും ഓക്സിറ്റോസിന്‍ കൂടുതലായി ഉണ്ടാകുന്നുവെന്നത് തെളിയിക്കപ്പെട്ടിട്ടുള്ളതാണ്. ഇങ്ങനെ വിവാഹിതരായ ദമ്പതികളെ ദീര്‍ഘകാലം സ്നേഹത്തോടെ ചേര്‍ത്ത് നിര്‍ത്തുന്നതില്‍ പ്രധാന പങ്ക് വഹിക്കുന്നതു ഓക്സിറ്റോസിനും വാസോപ്രസിനുമാണ്. ഈ ഹോർമോണുകൾ നൽകുന്ന അനുഭൂതി പലപ്പോഴും വ്യക്തി കേന്ദ്രീകൃതമാകണമെന്നില്ല. നമുക്ക് അച്ഛനമ്മമാരോട്, സഹോദരങ്ങളോട്, സുഹൃത്തുക്കളോട്, ഒരു കൊച്ചു കുഞ്ഞിനോടൊക്കെ തോന്നുന്ന നിർമ്മലവും.

നിസ്വാർത്ഥവുമായ സ്നേഹം എല്ലാം ഈ കെമിക്കൽ കുഞ്ഞന്മാരുടെ പണിയാണെന്നും ശാസ്ത്രജ്ഞർ പറയുന്നു. ഒപ്പം ഒന്നിലധികം പേരോട് ശാരീരികമായ പ്രണയം തോന്നുന്നതിലും ഇവർക്ക് പങ്കുണ്ടത്രേ (ഒക്കെ ഈ ന്യൂറോട്രാൻസ്മിറ്ററുകളുടെ പണിയാണ്. അല്ലാതെ, നമ്മളങ്ങനേന്നും.. അയ്യേ!. ഇങ്ങനെ കണ്ടുപിടിക്കപ്പെട്ടിട്ടുള്ളതും അല്ലാത്തതുമായ എത്രയോ സൂക്ഷ്മകണങ്ങളുടെ പ്രവര്‍ത്തനങ്ങളിലൂടെയാണ് പ്രണയം സാധ്യമാകുന്നത്. ''ഓ.. ഇതൊക്കെ അറിഞ്ഞിട്ടല്ലേ ഇത്രേം നാള് ആൾക്കാര് പ്രേമിച്ചത്" എന്നും "ശാസ്ത്രത്തിനെന്താ പ്രണയിക്കുന്നവരുടെ വീട്ടിൽ കാര്യ''മെന്നുമൊക്കെ ചിലരെങ്കിലും ഇപ്പോൾ ചിന്തിക്കുന്നുണ്ടാവും. ശരിയാണ്, പ്രണയത്തിന്റെ തറവാട്ടിൽ ശാസ്ത്രമൊരു അധികപ്പറ്റാണ്.

ഒരു പൂവിന്റെ നിറവും മണവുമെന്താണെന്നും എന്തുകൊണ്ടാണതങ്ങനെയെന്നും പറഞ്ഞു തരുന്ന ശാസ്ത്രം ആ കാഴ്ചയും സുഗന്ധവും നമ്മുടെ മനസിൽ പകരുന്ന അനുഭൂതിയെ വിശദീകരിക്കാൻ പരാജയപ്പെടുന്നപോലെ പ്രണയം പകരുന്ന അനുഭൂതിയെ, വേവലാതികളെയൊന്നും വിശദീകരിക്കാൻ ശാസ്ത്രത്തിനാവില്ല. ഒരിക്കലുമൊരു പ്രണയമാപിനിയോ ഏകകമോ കണ്ടെത്താനും ശാസ്ത്രത്തിനാവില്ല. പിന്നെയിങ്ങനെ ശാസ്ത്രീയമായി വിശദീകരിച്ചാലൊന്നും പ്രണയത്തിന്റെ ഊഷ്മളതയ്ക്ക് ഭംഗമൊട്ടുവരാനും പോകുന്നില്ല.

പിന്നെന്താ, ഇതിനെല്ലാറ്റിനും പിന്നിലൊരു ശാസ്ത്രമുണ്ടെന്നറിഞ്ഞിരിക്കാമല്ലോ. ഏതെങ്കിലും ഏടാകൂടങ്ങളിൽ ചെന്നുപെടുമ്പോൾ പറയാല്ലോ, ഏയ്.. ഞാനല്ലാ, എന്റെ ശരീരത്തിലെ കുറേ രാസവസ്തുക്കൾ പറ്റിക്കുന്ന പണിയാണിതൊക്കെയെന്ന്.!!

കുട്ടിയെ കാണാതായാൽ ആരെ വിളിക്കണം, എന്തൊക്കെ ചെയ്യണം?

child-abduction



കുഞ്ഞിന്റെ മരണമോ കാണാതാകലോ ആണ് ഒരു കുടുംബത്തിലുണ്ടാകാവുന്ന ഏറ്റവും വലിയ ദുരന്തങ്ങളിലൊന്ന്. കുട്ടികളെ കാണാതാവുന്നതു തടയാനായി നിർബന്ധമായും പാലിക്കേണ്ട കാര്യങ്ങൾ ഇവയാണ്.

മാതാപിതാക്കളും കുടുംബാംഗങ്ങളും:

  •  കുട്ടികൾ എപ്പോഴും മാതാപിതാക്കളുടെയോ മുതിർന്നവരുടെയോ കൺവെട്ടത്തു തന്നെ ഉണ്ടാവണം. കുട്ടി മുറ്റത്തു കളിക്കുകയാണെങ്കിൽ മുതിർന്നവർ നോക്കിയിരിക്കണം. കുറച്ചു സമയത്തേക്കുള്ള ശ്രദ്ധ നഷ്‌ടപ്പെടൽ പോലും തട്ടിക്കൊണ്ടുപോകുന്നതിനോ കുട്ടി അപകടങ്ങളിൽപ്പെടുന്നതിനോ വഴിതെളിക്കുമെന്നു മറക്കാതിരിക്കുക.
     
  •  കുട്ടി കളിക്കാൻ പോകുന്ന സ്ഥലങ്ങളിൽ ഉത്തരവാദിത്തമുള്ള ആളുകളുടെ മേൽനോട്ടം ഉണ്ടെന്ന് ഉറപ്പാക്കുക.
     
  •  സ്കൂളിലേക്കും തിരിച്ചുമുള്ള യാത്രകളിലും ബസ് കാത്തു നിൽക്കുന്നിടത്തും ഇറങ്ങുന്നിടത്തും യാത്രാവഴികളിലും സുരക്ഷ ഉറപ്പാക്കുക.
     
  •  വീട്ടിൽ നിന്ന് ഒളിച്ചോടിപ്പോകുന്ന കുട്ടികളാണു കാണാതാവുന്നവരിൽ നല്ലൊരു പങ്ക്. കൂടുതൽ പഠിക്കുന്നതിനും മാർക്കു നേടുന്നതിനുമുള്ള സമ്മർദവും പീഡനവുമൊക്കെയാണ് ഇതിനു കാരണം. കുഞ്ഞുങ്ങളുമായി നിരന്തരം ആശയവിനിമയം നടത്തുക. അവരെ കേൾക്കുകയും തുറന്നു സംസാരിക്കുകയും ചെയ്യുക. കുട്ടിയെ സമ്മർദത്തിലാക്കാതിരിക്കുക. പീഡനശിക്ഷകൾ ഒഴിവാക്കുക.

പൊതുജനം: 

  •  കുട്ടി ഭിക്ഷയെടുക്കുന്നതോ സാധനങ്ങൾ വിൽക്കുന്നതോ കണ്ടാൽ ഉടൻ ചൈൽഡ് ലൈനിലോ (1098) പൊലീസിലോ (100) അറിയിക്കുക. ബാലഭിക്ഷാടനം അധികൃതശ്രദ്ധയിൽ പെട്ടെന്നു പതിയുന്നു എന്നതു ഭിക്ഷാടനത്തിനായി കുട്ടികളെ തട്ടിക്കൊണ്ടു പോകുന്നതു തടയും.
     
  •  കുട്ടിയെ കാണാതാവുന്ന ആദ്യ ഒരു മണിക്കൂറിൽ തന്നെ 1098ലോ 100ലോ വിവരമറിയിക്കുക. സുവർണമണിക്കൂർ എന്നറിയപ്പെടുന്ന ഈ ആദ്യ ഒരു മണിക്കൂർ ഏറെ നിർണായകമാണ്. കുട്ടി തിരിച്ചുവരുമെന്നു കരുതി ആദ്യ മണിക്കൂറിനുള്ളിൽ അധികൃതരെ അറിയിക്കാതിരുന്നാൽ തട്ടിക്കൊണ്ടുപോകുന്നവർക്ക് എളുപ്പത്തിൽ കുട്ടിയെ ദൂരേക്കു മാറ്റാനാവും.
     
  •  ഭിക്ഷാടനം നടത്തുന്ന കുട്ടികളുടെ ഫോട്ടോ സമൂഹമാധ്യമങ്ങളിൽ ഷെയർ ചെയ്യരുത്. പകരം അതു പൊലീസിനു നൽകുക. ‌

Saturday, 27 January 2018

അച്ഛനുമമ്മയും കൗമാരക്കാരോടു പറയേണ്ടത്...

Designed by Freepik

പൊടിമീശ മുളയ്ക്കണ കാലം ഇടനെഞ്ചിൽ ബാൻഡടി മേളം– കൗമാരകാലത്ത് ആൺ– പെൺ മക്കൾക്ക് ഇടനെഞ്ചിൽ ബാൻഡടി മേളമാണെങ്കിൽ മാതാപിതാക്കൾക്ക് പഞ്ചാരി മേളത്തിന്റെ കാലമാണ്. കൗമാരത്തിലേക്ക് കാലൂന്നാനൊരുങ്ങുന്ന ആൺമക്കളും പെൺകുട്ടികളുമുള്ള മാതാപിതാക്കൾക്കു ടെൻഷനടിക്കാതിരിക്കാനാവില്ല. കാരണം ജീവിത രീതിയും സാഹചര്യങ്ങളും മാറി, അണുകുടുംബങ്ങളാവുമ്പോൾ മക്കളുടെ കാര്യത്തിൽ കൂടുതൽ ശ്രദ്ധിക്കാമെന്ന് കരുതിയതൊക്കെ തെറ്റി,

കാണുന്നതെന്തിനോടും കൗതുകം തോന്നുന്ന പ്രായത്തിൽ എങ്ങനെ മക്കൾക്കു നല്ലതും ചീത്തയും പറഞ്ഞുകൊടുക്കും.

വഴിതെറ്റാനാണെങ്കിൽ മാർഗങ്ങള്‍ ഒരുപാടുണ്ട്. അവർ ചെയ്യുന്ന കാര്യങ്ങളും ടെക്നോളജിയുമൊന്നും പഴയ തലമുറയ്ക്ക് അത്ര പിടികിട്ടുകയുമില്ല.അതേപോലെ എല്ലാ വീട്ടിലും മക്കളോടുള്ള ബന്ധം ഒരേപോലെ ആവണമെന്നില്ല, സ്നേഹത്തെ കാർക്കശ്യത്തിന്റെ മറയിൽ പൊതിയുന്നവരുണ്ടാവാം, അമിത സ്നേഹത്തിൽ മക്കളുടെ എന്താഗ്രഹവും സാധിക്കുന്നവരുമുണ്ടാകാം. എന്നാൽ ഏതു തരത്തിലുള്ള മാതാപിതാക്കളായാലും മക്കളോട് കൗമാരപ്രായത്തിൽ പറഞ്ഞിരിക്കേണ്ട പല കാര്യങ്ങളുമുണ്ട്.

എന്തൊക്കെയാണ് പറഞ്ഞുകൊടുക്കേണ്ടതെന്നും എങ്ങനെയാണ് പറയേണ്ടതെന്നുമുള്ള സംശയമൊക്കെ പലരും പറയാറുണ്ട്. നമ്മോടൊപ്പം അല്ലെങ്കിൽ നമ്മേക്കാളേറെ ഗ്രഹണശേഷിയുള്ളവരാണ് കുട്ടികളെന്ന് മനസിലാക്കി അവരോട് ഇടപെടുക. എന്താണ് പറഞ്ഞുകൊടുക്കുകയെന്ന സംശയമുള്ളവർ സ്വയം വിലയിരുത്തൽ നടത്തുക. തങ്ങളുടെ ധാരണകളും തെറ്റിദ്ധാരണകളും അടിച്ചേൽപ്പിക്കുകയല്ല വേണ്ടത്. ശാസ്ത്രീയമായി തയ്യാറാക്കിയ നിരവധി വിഡിയോകളും ശാസ്ത്രീയമായി വിവരിക്കുന്ന വെബ്പേജുകളും തുടങ്ങി ഇന്റർനെറ്റ്, പുസ്തകങ്ങൾ തുടങ്ങിയവയുടെയൊക്കെ സഹായം തേടാം. ഫാമിലി ഡോക്ടറുടെ സഹായവും ഇക്കാര്യത്തിൽ ചോദിക്കാവുന്നതാണ്.

ആരു പറയണം അച്ഛനോ അമ്മയോ?

കുടുംബ ബന്ധങ്ങളുടെ ഊഷ്മളത അനുസരിച്ചാവണം അതു തീരുമാനിക്കുക, സ്നേഹത്തിൽ പൊതിഞ്ഞ ഗൗരവം കാണിക്കുന്ന അച്ഛനോ എന്തും തുറന്നുപറയാവുന്ന അമ്മയോ അല്ലെങ്കിൽ തിരിച്ചോ ആവും പല കുടുംബത്തിലുമുണ്ടാവുക, കുട്ടിയുമായുള്ള നിങ്ങളുടെ സംസാരത്തിനനുസരിച്ചാവണം രണ്ടുപേർ ചേർന്നുവേണോ അതോ ഒരാൾ പറഞ്ഞു നൽകിയാൽ മതിയോ എന്നു തീരുമാനിക്കേണ്ടത്. പറഞ്ഞുകൊടുക്കേണ്ട പ്രത്യേക സമയത്തിനായി കാത്തിരിപ്പ് വേണ്ട, എത്രയും നേരത്തേ ആകുന്നോ അത്രയും നല്ലത്.

ഞാൻ എങ്ങനെ ഉണ്ടായി?

സാധാരണ കുട്ടികൾ ചെറുപ്പകാലത്ത് ചോദിക്കാറുള്ള ചോദ്യമാണ് ഇത്. എങ്ങനെയാണ് ഞാൻ ഉണ്ടായതെന്ന് കുട്ടിചോദിക്കുമ്പോൾ അവനെ വഴക്കുപറഞ്ഞ് തെറ്റായ എന്തോ ചോദിച്ചപോലെ കുറ്റബോധത്തിലാക്കാതെ പറഞ്ഞുമനസിലാക്കിക്കൊടുക്കുക, ഓരോ പ്രായത്തിലുള്ള കുട്ടികൾക്കും അവർക്കാവശ്യമുള്ള വിവരങ്ങൾ നൽകുക. ഇത് കുട്ടികൾ അവരുടെ സംശയങ്ങൾ തുറന്നു ചോദിക്കാനും തെറ്റിദ്ധാരണകൾ രൂപം കൊള്ളാതിരിക്കാനും സഹായിക്കും.ചർച്ചകൾ ഒഴിവാക്കിക്കൊണ്ട് ഒളിച്ചോടരുത്. ഇന്റർനെറ്റിൽ നിന്ന് വിവരങ്ങൾ ശേഖരിക്കുന്നതിനെക്കാൾ നിങ്ങളുടെ കുട്ടി നിങ്ങളിൽ നിന്ന് പഠിക്കുന്നത് മെച്ചമായിരിക്കും എന്ന് വിശ്വസിക്കുക. മൊബൈലും ടാബുമൊക്കെ കുട്ടികളെ തെറ്റായ തിരച്ചിലിലേക്ക് നയിക്കുമ്പോൾ വികലമായ ലൈംഗിക ധാരണകളാവും അവരുടെ മനസ്സിൽ രൂപപ്പെടുക,

പ്രത്യേക അവസരമുണ്ടാകാന്‍ കാത്തിരിക്കേണ്ടതില്ല, ഏതൊരു ദിവസവും സാധാരണ കാര്യം സംസാരിക്കുന്നതുപോലെ സംസാരിച്ചു തുടങ്ങാം. വലിയ മുന്നൊരുക്കങ്ങളോ ആമുഖങ്ങളോ നൽകി കുട്ടികളെ സങ്കോചിതരാക്കരുത്. നിങ്ങളുടെ കുട്ടിയുടെ കാഴ്ചപ്പാടുകളെ എല്ലായ്പ്പോഴും പരിഗണിക്കുക. യുക്തിയുടെയും വികാരത്തിന്റെയും ഉചിതമായ ഒരു മിശ്രിതം ഉപയോഗിക്കുക. നിങ്ങളുടെ ധാരണകളല്ല കുട്ടികൾക്ക് പറഞ്ഞു കൊടുക്കേണ്ടത്. സംസാരിക്കുന്ന വിഷയങ്ങളെപ്പറ്റി പൂർണബോധ്യമുണ്ടായിരിക്കണം. സംശയങ്ങൾ തീർത്തുകൊടുക്കാനും കഴിയണം.

ലൈംഗികബന്ധങ്ങളെക്കുറിച്ച് പറയുമ്പോൾ

ലൈംഗിക ബന്ധം സ്വാഭാവിക പ്രതിഭാസമാണെന്നും അതിൽ ചീത്തയായി ഒന്നും ഇല്ലെന്നും അവരെ പറഞ്ഞു മനസ്സിലാക്കുക. മാത്രമല്ല ഇത് സന്തോഷത്തിനു മാത്രമുള്ളതല്ലെന്നും ആരോഗ്യകരമായും സാമൂഹികമായും നിരവധി ഗുണങ്ങളുണ്ടെന്നും ധരിപ്പിക്കാനാവണം. അതോടൊപ്പം സുരക്ഷിതമല്ലാത്ത ലൈംഗികത വളരെ അപകടകരമാണെന്ന് പറഞ്ഞുകൊടുക്കുക. ലൈംഗിക ബന്ധങ്ങളോടുള്ള അവരുടെ വീക്ഷണം മെച്ചപ്പെടുത്താൻ സഹായിക്കുക.

കൗമാരപ്രായത്തിൽ‌ ശരീരവും മാനസികാവസ്ഥയും മാറിക്കൊണ്ടിരിക്കും. അത് സ്വാഭാവികമാണെന്ന് പറഞ്ഞു കൊടുക്കണം. സെക്ഷ്വൽ ഓറിയന്റേഷനുകളെപ്പറ്റിയും (ഹെറ്ററോ സെക്‌ഷ്വൽ, ഹോമോ സെക്‌ഷ്വൽ, ബൈസെക്‌ഷ്വൽ) അവയുടെ സാമൂഹികാവസ്ഥകളെക്കുറിച്ചും പറഞ്ഞുകൊടുക്കാം. അവരുടെ എല്ലാ പ്രശ്നങ്ങളിലും അവരോടൊപ്പം ഉണ്ടായിരിക്കണം. അതോടൊപ്പം ആൽക്കഹോൾ ഉപയോഗം ചിന്തകളെയും ആരോഗ്യത്തെയും ബാധിക്കുമെന്നും പറഞ്ഞുകൊടുക്കണം.

ഈ അഞ്ചു കാര്യങ്ങള്‍ മതി പ്രണയത്തില്‍ വീഴാന്‍

Designed by Freepik

പ്രണയം എന്നത് ആര്‍ക്കും പ്രവചിക്കാന്‍ കഴിയാത്ത ഒരു വികാരമാണ് എന്നു പറയാറുണ്ട്‌. ആര്‍ക്ക് ആരോട് എങ്ങനെ എപ്പോള്‍ വേണമെങ്കിലും പ്രണയം തോന്നാം. എന്നാല്‍ എന്തു കൊണ്ടാണ് ഒരാള്‍ക്ക് ഒരു പ്രത്യേക വ്യക്തിയോട് മാത്രം പ്രണയം തോന്നുന്നത് ?

അതിനൊരുത്തരം കണ്ടെത്തുക പ്രയാസകരമാണ്. എങ്കിലും ഒരിക്കലും ഒരാള്‍ മാത്രം വിചാരിച്ചാല്‍ പ്രണയമുണ്ടാകില്ല. രണ്ടുപേര്‍ക്കും ഒന്നിച്ചു തോന്നിയാല്‍ മാത്രമാണ് അവിടെ പ്രണയം ജനിക്കുന്നത്.

 എന്നാല്‍ ചില പൊടികൈകള്‍ പ്രയോഗിച്ചാല്‍ നിങ്ങള്‍ ആഗ്രഹിക്കുന്ന വ്യക്തിയുടെ ഇഷ്ടം പിടിച്ചുപറ്റാന്‍ കഴിയുമെന്നാണ് ഗവേഷകര്‍ പറയുന്നത്. നൂറുശതമാനം ഉറപ്പു പറയാന്‍ കഴിയില്ലെങ്കിലും ഈ വിദ്യകള്‍ ഒന്നു പരീക്ഷിച്ചു നോക്കാം.


അങ്ങനെ എളുപ്പത്തില്‍ നേടാനാവില്ല 


അത്രപെട്ടെന്നു നേടാന്‍ കഴിയില്ല എന്നു തോന്നുന്ന എന്തും സ്വന്തമാക്കാന്‍ ആളുകള്‍ക്ക് താല്‍പര്യം വര്‍ധിക്കും. പ്രേമത്തിന്റെ കാര്യത്തിലും ഇത് ഒരുപരിധി വരെ ശരിയാണെന്ന് മനശാസ്ത്രജ്ഞന്‍ പറയുന്നു. മനശാസ്ത്ര വിദഗ്ധനായ റോബര്‍ട്ട്‌ സിയാല്‍ഡിനിയുടെ സ്കാര്‍സിറ്റി പ്രിസിപ്പല്‍ ( scarcity principle) ഇത് ശരിവയ്ക്കുന്നുണ്ട്. അതുകൊണ്ടു തന്നെയാണ് പ്രണയിക്കുന്ന ആളുടെ ശ്രദ്ധ പിടിച്ചു പറ്റാന്‍ എതിര്‍ കക്ഷി പരമാവധി ശ്രദ്ധിക്കുന്നതും.

കണ്ണും കണ്ണും നോക്കിയാല്‍ഇഷ്ടങ്ങളും ശീലങ്ങളും അറിഞ്ഞുവയ്ക്കാം


കണ്ണുകളില്‍ നോക്കി സംസാരിക്കുന്നതും പ്രണയവും തമ്മില്‍ എന്തു ബന്ധമെന്ന് ചോദിക്കേണ്ട കാര്യമില്ല. കണ്ണുകള്‍ മനസ്സിന്റെ വാതിലുകള്‍ ആണെന്നാണ് പറയാറ്. പരസ്പരം പരിചയമില്ലാത്ത ഒരു സ്ത്രീയും പുരുഷനും തമ്മില്‍ രണ്ടു മിനിറ്റ് കണ്ണുകളില്‍ നോക്കി സംസാരിച്ചാല്‍ അവര്‍ക്കിടയില്‍ സ്നേഹത്തിന്റെ ഒരു ബോണ്ട്‌ രൂപപ്പെടുമെന്നാണ് പഠനങ്ങള്‍ പറയുന്നത്. അപ്പോള്‍ പിന്നെ പ്രണയിക്കാന്‍ സാധ്യത ഉള്ളവരുടെ കാര്യം പറയണോ.


ഇഷ്ടപ്പെടുന്ന ആളിന്റെ ഇഷ്ടങ്ങള്‍, ശീലങ്ങള്‍, താൽപര്യങ്ങള്‍ എല്ലാം അറിഞ്ഞു വയ്ക്കാന്‍ എല്ലാവർക്കും ഇഷ്ടമാണ്. നമ്മളെപ്പോലെ തന്നെ ഇഷ്ടങ്ങള്‍ ഉള്ള ഒരാളോട് പ്രണയം തോന്നുക സ്വാഭാവികം. ഒരേ താൽപര്യങ്ങള്‍ ഉള്ളവര്‍ തമ്മില്‍ ആകര്‍ഷണം തോന്നുമെന്നത് പഠനങ്ങളില്‍ പോലും തെളിഞ്ഞ കാര്യമാണ്.

അഡ്രിനാലിന്‍ ഗ്രന്ഥിയും പ്രണയവും 


അഡ്രിനാലിന്‍ (adrenaline) ഗ്രന്ഥികളുടെ പ്രവര്‍ത്തനവും ശാരീരികആകര്‍ഷണവും തമ്മിലെന്തു ബന്ധം എന്നു ചിന്തിക്കാന്‍ വരട്ടെ. നമുക്ക് ടെന്‍ഷനും പേടിയും ഉണ്ടാകുമ്പോള്‍ ശരീരം പുറപ്പെടുവിക്കുന്ന ഹോര്‍മോണ്‍ ആണ് അഡ്രിനാലിന്‍. ഇതു തെളിയിക്കാനായി ഒരു സംഘം ആളുകളെ പഠനത്തിന്റെ ഭാഗമായി ഒരു കുലുങ്ങുന്ന പാലത്തില്‍ നിര്‍ത്തി. പെട്ടെന്നുള്ള ഭയത്തില്‍ അവരില്‍ ഭൂരിഭാഗവും ആ സമയത്ത് തങ്ങളുടെ പങ്കാളികളെ കുറിച്ചോ പ്രണയഭാജനത്തെ കുറിച്ചോ അറിയാതെ ചിന്തിച്ചിരുന്നു എന്നു കണ്ടെത്തി. 

ആ 36 ചോദ്യങ്ങള്‍


എന്താണ് പ്രണയത്തില്‍ വീഴാനുള്ള ആ 36 ചോദ്യങ്ങള്‍ എന്നാണോ ചിന്തിക്കുന്നത്? എങ്കില്‍ കേട്ടോളൂ 2015 ല്‍ പ്രസിദ്ധീകരിച്ച മാൻഡി ലെന്‍ കാട്രോൺസസ് മോഡേണ്‍ ലവ് എസ്സേയിലാണ് ഇതിനെ കുറിച്ചു പറയുന്നത് (Mandy Len Catron’s’s modern love essay). ഇതില്‍ പ്രശസ്ത മനശ്ശാസ്ത്രവിദഗ്ധനായ ആര്‍തര്‍ ആരോണ്‍ 1967ല്‍ നടത്തിയൊരു പഠനത്തിലാണ് ഈ 36 ചോദ്യങ്ങള്‍ വികസിപ്പിച്ചിരുക്കുന്നത്. എന്തെങ്കിലും ആകർഷണമോ സൗഹൃദമോ ഉള്ള രണ്ടു വ്യക്തികള്‍ക്കിടയിലെ പ്രണയത്തെ പുറത്തു കൊണ്ടുവരാന്‍ ഈ ചോദ്യങ്ങള്‍ക്ക് കഴിയുമെന്നാണ് തെളിയിച്ചിരിക്കുന്നത്.

Thursday, 25 January 2018

അനുഭവങ്ങളുടെ രുചിയും മണവും

ഓരോ മൊഡാലിറ്റിയും അനുസരിച്ച് അവയില്‍ തന്നെ അതിന്റെ വകഭേദങ്ങളുണ്ട്. ഇവയ്ക്ക് 'സബ്‌മൊഡാലിറ്റീസ്' എന്നു പറയുന്നു

Designed by Freepik
  മനുഷ്യന്‍ കാര്യങ്ങള്‍ ഗ്രഹിക്കുന്നത് പഞ്ചേന്ദ്രിയങ്ങളിലൂടെയാണ്. ഈ പഞ്ചേന്ദ്രിയങ്ങളെ എന്‍.എല്‍.പിയില്‍ 'മൊഡാലിറ്റീസ്'എന്നു വിളിക്കുന്നു. നമ്മുടെ അനുഭവങ്ങള്‍ തലച്ചോറില്‍ ശേഖരിക്കപ്പെടുന്നത് ചിത്രങ്ങള്‍, ശബ്ദങ്ങള്‍, ഗന്ധം, രുചി എന്നീരീതികളിലാണ്.
 
ഓരോ മൊഡാലിറ്റിയും അനുസരിച്ച് അവയില്‍ തന്നെ അതിന്റെ വകഭേദങ്ങളുണ്ട്. ഇവയ്ക്ക് 'സബ്‌മൊഡാലിറ്റീസ്' എന്നു പറയുന്നു. മൊഡാലിറ്റിയിലെ സബ്‌മൊഡാലിറ്റികള്‍ മനസിലാക്കുവാന്‍ താഴെകൊടുക്കുന്ന ഉദാഹരണത്തിലൂടെ കഴിയും.

കാണുക അല്ലെങ്കില്‍ ചിത്രങ്ങളായി മനസിലാക്കുക എന്നത് ഉദാഹരണമായി കാണുവാന്‍ ഇഷ്ടപ്പെടുന്ന ഒരാള്‍ താന്‍ കണ്ട കാര്യങ്ങളെ വര്‍ണാഭമായ, കട്ടികൂടിയ ചിത്രങ്ങളായി ആയിരിക്കും ഓര്‍മ്മകളില്‍ പകര്‍ത്തുക.

ഈ വര്‍ണാഭമായ കട്ടികൂടിയ ചിത്രത്തിന്റെ അവസ്ഥയാണ് സബ്‌മൊഡാലിറ്റി എന്നതുകൊണ്ട് അര്‍ഥമാക്കുക. ഇത് ചിത്രം മനസില്‍ കാണുമ്പോഴുള്ള അകലം, ആഴം, വര്‍ണം എന്നിവയൊക്കെയാകാം.

കേള്‍ക്കുവാന്‍ ആഗ്രഹിക്കുന്ന വ്യക്തിയെ സംബന്ധിച്ചിടത്തോളം കേട്ട കാര്യങ്ങളുടെ ശബ്ദ തീവ്രത, ശബ്ദ കാഠിന്യം, ശബ്ദവ്യതിയാനം, ഉറവിടം എന്നിങ്ങനെ വ്യത്യസ്തങ്ങളായ സബ്‌മൊഡിലിറ്റികളിലൂടെ രേഖപ്പെടുത്തപ്പെടാം.

അനുഭവങ്ങള്‍ക്ക് കൂടുതല്‍ സ്വാധീനം ചെലുത്തുവാന്‍ കഴിയുന്നവരുടെ ഓര്‍മ്മയില്‍ സ്പര്‍ശനത്തിന്റെ സമ്മര്‍ദമായും ഊഷ്മാവായും സമയദൈര്‍ഘ്യമായും രേഖപ്പെടുത്തപ്പെടും.

രുചിയുടെയും ഗന്ധത്തിന്റെയും കാര്യങ്ങള്‍ ഇതുപോലെതന്നെ. ഇത്തരം സബ് മൊഡാലിറ്റികളിലാണ് നല്ലതും മോശവുമായഅനുഭവങ്ങളുടെ പുനഃരാവിഷ്‌കരണം മനുഷ്യമനസില്‍ നടത്തുന്നതും അവയെ ഓര്‍മ്മയില്‍ തങ്ങിനിര്‍ത്തുന്നതും.

ആഗ്രഹങ്ങളും സബ്‌മൊഡാലിറ്റികളും


ഗ്രഹിക്കപ്പെടുന്ന വസ്തുക്കള്‍ (കാഴ്ച, കേള്‍വി, അനുഭവം, രുചി, ഗന്ധം) നല്ലതാണെങ്കില്‍ അവയെ ഓര്‍മ്മയില്‍ തങ്ങിനിര്‍ത്തുന്ന സബ്‌മൊഡാലിറ്റികളുടെ സ്വാധീനം വ്യക്തിക്ക് നന്മയ്ക്കായി ഭവിക്കും.

എന്നാല്‍ ഗ്രഹിക്കുന്ന വസ്തു തങ്ങള്‍ വേദനാജനകമോ ഭയപ്പെടുത്തുന്നതോ അല്ലെങ്കില്‍ ഏതെങ്കിലും തരത്തിലുള്ള നെഗറ്റീവായ വസ്തുക്കളുമായി ബന്ധപ്പെട്ടതെങ്കില്‍ അവസ്ഥയിലെ സബ്‌മൊഡാലിറ്റികള്‍ അത്തരം നെഗറ്റീവായ ഓര്‍മ്മകളെ ഉണര്‍ത്തി പ്രശ്‌നങ്ങള്‍ വരുത്തിവയ്ക്കുന്നു.

ഒരു വ്യക്തിയുടെ മനോഹരമായ പൂന്തോട്ടത്തിലെ സന്ദര്‍ശനം, കാഴ്ച, കേള്‍വി, സ്പര്‍ശം (അനുഭവം), ഗന്ധം എന്നീ മൊഡാലിറ്റികളുടെ സബ്‌മൊഡാലിറ്റികളായി ഓര്‍മ്മയില്‍ ശേഖരിക്കപ്പെടുന്നു. ഇത് ആ വ്യക്തിക്ക് സന്തോഷവും ആനന്ദവും നല്കും. ആ അനുഭവം എന്ത് ഓര്‍ത്താലും അത് ആ വ്യക്തിക്ക് നല്ലതുതന്നെ.

എന്നാല്‍ ഒരപകടം കണ്‍മുന്നില്‍ കാണുന്ന വ്യക്തി സബ്‌മൊഡാലിറ്റികളുടെ തീവ്രതയില്‍ വീണ്ടും അത് തുടര്‍ച്ചയായി ഓര്‍ക്കുന്നുവെങ്കില്‍ അത് ആരോഗ്യത്തെ മോശമായി ബാധിക്കും. ഇവിടെ സബ് മൊഡാലിറ്റിയില്‍ മാറ്റം വരുത്തണം.

ചിന്തകള്‍ക്ക് നിറം പകരാം


ഒരു വ്യക്തി വളരെ അവശനും ഊര്‍ജം ഇല്ലാത്തവനുമാണെങ്കില്‍ ആ വ്യക്തിക്ക് പോഷകാംശമുള്ള ഭക്ഷണം, ജലം എന്നിവ നല്‍കുന്നതിനൊപ്പം ആ വ്യക്തിയുടെ മനസില്‍ നല്ല ചിന്തകളുടെ സബ്‌മൊഡാലിറ്റികള്‍ വര്‍ണാഭമാക്കണം.

ശബ്ദത്തിന്റെ തീവ്രത വര്‍ധിപ്പിക്കണം, അനുഭവം ആഴപ്പെടുത്തുകയും രുചികരവും സുഗന്ധപൂരിതമാക്കുകയും വേണം. ഇതിലൂടെ ആ വ്യക്തി നല്ല ചിന്തകളുടെ ലോകത്തേക്ക് ആനയിക്കപ്പെടുന്നു. എന്നാല്‍ അനുഭവം മോശമാണെങ്കില്‍ സബ്‌മൊഡാലിറ്റികളുടെ കടുപ്പവും തീവ്രതയുമെല്ലാം കുറച്ചുകൊണ്ടുവരികയെന്നത് അനിവാര്യമാണ്.

ഈ പ്രക്രിയ ഒരു മായ്ച്ചുകളയല്‍ പ്രക്രിയയാണ്. ഓര്‍ക്കുക, ഒരു വ്യക്തിയുടെ, മൊഡാലിറ്റികളെ സ്വാധീനിക്കുവാന്‍ മായിച്ചുകളയലും ബലപ്പെടുത്തലും ഒരുപോലെ സഹായകരമായിരിക്കും.

Saturday, 20 January 2018

ശ്രീദേവിക്കു ബ്രെയിന്‍ ട്യൂമർ? സത്യാവസ്ഥ ഇതാണ്!



അമ്പതുകളിലും ശ്രീദേവിയെപ്പോലെ സൗന്ദര്യം കാത്തുസൂക്ഷിക്കുന്ന നടിമാരുണ്ടോ എന്നതു സംശയമാണ്. പല യുവനടിമാരേക്കാളും ഊർജസ്വലയായാണ് ശ്രീദേവിയെ എപ്പോഴും കണ്ടിട്ടുള്ളത്. ആ നടിക്ക് എന്തെങ്കിലും ചെറിയ പ്രശ്നം ഉണ്ടെന്നു േകൾക്കുമ്പോൾ ആരാധകർക്കതു സഹിക്കാൻ കഴിയില്ല. കഴിഞ്ഞ കുറച്ചു ദിവസങ്ങളായി സമൂഹമാധ്യമത്തിലൂടെ പ്രചരിക്കുന്നൊരു വാർത്ത ശ്രീദേവിയുടെ ആരോഗ്യാവസ്ഥയിൽ ആശങ്ക പ്രകടിപ്പിച്ചിട്ടുള്ളതാണ്. ബ്രെയിൻ ട്യൂമറിനു ചികിൽസയിലായിരുന്ന താരത്തിനു നടത്തിയ ശസ്ത്രക്രിയയിൽ പിഴവു സംഭവിച്ചു എന്ന തലക്കെട്ടോടെയാണ് വാർത്തകൾ പ്രചരിച്ചിരുന്നത്. എന്നാൽ ഈ പ്രചരണം അടിസ്ഥാന രഹിതമാണെന്നും ശ്രീദേവി പൂർണ ആരോഗ്യവതിയാണെന്നും താരത്തോട് അടുത്ത വൃത്തങ്ങൾ വ്യക്തമാക്കി.

യുഎസ്എയിൽ വച്ച് ശ്രീദേവിക്കു നടത്തിയ ബ്രെയിൻ ട്യൂമർ ശസ്ത്രക്രിയയിൽ പിഴവു സംഭവിച്ചു എന്നായിരുന്നു വാർത്ത. ശസ്ത്രക്രിയ നടത്തേണ്ട ഭാഗത്തിനു പകരം മറ്റൊരു ഭാഗത്താണ് നടത്തിയതെന്നും വാർത്തയിലുണ്ടായിരുന്നു. ഇവയെല്ലാം താരത്തിന്റെ ആരാധകരെ ചില്ലറയൊന്നുമല്ല അസ്വസ്ഥരാക്കിയത്. ഒടുവിൽ അതു ശ്രീദേവിയുടെ കാര്യമല്ലെന്നും പണ്ട് ശ്രീദേവിയുടെ അമ്മയ്ക്കു സംഭവിച്ചതാണെന്നും താരത്തോട് അടുപ്പമുള്ളവർ വ്യക്തമാക്കിയതോടെയാണ് ആരാധകർക്ക് ആശ്വാസമായത്.

1995ൽ ശ്രീദേവിയുടെ അമ്മയുടെ തലച്ചോറിന്റെ ഇടതുഭാഗത്ത് മാരകമായൊരു ട്യൂമർ കണ്ടെത്തിയ സാഹചര്യത്തിൽ അവർക്കു ശസ്ത്രക്രിയ നിർദ്ദേശിച്ചിരുന്നു. എന്നാൽ മറ്റൊരു രോഗിയുടെ എക്സ്റേയുമായി ഓപറേഷൻ റൂമിലേക്കെത്തിയ ന്യൂറോസര്‍ജന് ശ്രീദേവിയുടെ അമ്മയ്ക്കു ശസ്ത്രക്രിയ ന‌ടത്തിയപ്പോൾ പിഴവു പറ്റുകയായിരുന്നു. പിന്നീട് മറ്റൊരു ആശുപത്രിയിൽ പ്രവേശിപ്പിക്കുകയും അവിടെനിന്നും ട്യൂമർ നീക്കം ചെയ്യുകയുമാണ് ഉണ്ടായത്. ഈ സംഭവത്തെയാണ് ഇപ്പോൾ ശ്രീദേവിക്കു പറ്റിയതെന്നു പറഞ്ഞ് പലരും പ്രചരിപ്പിക്കുന്നത്.

Comments System

Disqus Shortname