സ്ത്രീകൾക്കാണ് 'തലവേദന' കൂടുതൽ; കാരണമെന്ത്?

Designed by Freepik

അതിവേഗത്തിൽ പുരോഗമിച്ചുകൊണ്ടിരിക്കുന്ന മനുഷ്യരാശിയിൽ ചിലരിൽ തലവേദന വരുന്നതിൽ അതിശയിക്കാനില്ല. ടെൻഷൻ സഹജമായ തലവേദന സർവസാധാരണമാണ്. മിക്കവരിലും ടെൻഷൻ മൂലമുണ്ടാകുന്ന തലവേദന എപ്പോഴങ്കിലും വന്നുകാണും. തലയ്ക്കു ചുറ്റും ഒരു കയർ ശക്തമായി വരിഞ്ഞുമുറുക്കിയ മാതിരിയാണ് വേദനയെന്ന് ചിലർ വിവരിക്കാറുണ്ട‍്. എന്നാൽ, അടിക്കടിവന്നുകൊണ്ടിരിക്കുന്ന നിങ്ങളുടെ തലവേദന കൊടിഞ്ഞി ആയിരിക്കണം. ഇടയ്ക്കിടക്ക് ജോലിക്കു പോകാൻ പറ്റാതെ വരുന്നതു മിക്കപ്പോഴും കൊടിഞ്ഞി (മൈഗ്രേൻ) മൂലമാണ്. കൊടിഞ്ഞി ചിലപ്പേ‍ാൾ തലയുടെ ഒരു വശത്തു മാത്രമേ ബാധിക്കാറുള്ളൂ. കൊടിഞ്ഞിക്കു പാരമ്പര്യപ്രവണത കാണുന്നുമുണ്ട്. കാലാവസ്ഥാ മാറ്റം കൊണ്ടുമാത്രം കൊടിഞ്ഞി വരികയില്ല.

ഇരുപതു ശതമാനം സ്ത്രീകളിലും ആറുശതമാനം പുരുഷന്മാരിലും കൊടിഞ്ഞി വരുന്നതായി കണക്കുകൾ കാണിക്കുന്നു. പൂർണരൂപത്തിൽ വിവരിക്കുമ്പോൾ മിനിറ്റുകളോളം മുന്നോടിയായി ഒരു കൊള്ളിയാൻ മിന്നുന്നതു മാതിരി ഒരു പ്രകാശം ദൃശ്യമായേക്കാം. തുടർന്നു കുറേസമയം പ്രകാശം വന്ന ഭാഗത്ത് അന്ധകാരമായിരിക്കും അനുഭവപ്പെടുന്നത്. ഇരുപതു ശതമാനം കൊടിഞ്ഞി രോഗികൾക്കു മാത്രമേ ഈ മുന്നോടി പ്രകാശം പ്രത്യേക്ഷപ്പെടുന്നുള്ളൂ. ശക്തമായ തലവേദനയായിരിക്കും വരുന്നത്. തുടിക്കുന്ന മാതിരിയാണു വിവരിക്കാറുള്ളത്. വെളിച്ചവും ശബ്ദവും ചിലരിൽ വേദന കൂട്ടുന്നുണ്ട്. പലപ്പോഴും വാതിലും ജനലുമെല്ലാം അടച്ചു ചെവിയിൽ പ‍ഞ്ഞിയും വച്ചു തനിയെ കിടന്നുറങ്ങാൻ ശ്രമിക്കാറുണ്ട്. ഒന്നുരണ്ടു പ്രാവശ്യം ഛർദിച്ചു കഴിയുന്നതോടെ തലവേദന മാറുന്നതായും കാണുന്നുണ്ട്.

സ്ത്രീകളിൽ മാസമുറയുമായി ബന്ധപ്പെട്ടു ചില ദിവസങ്ങളിൽ തലവേദന കാണാറുള്ളതിനാൽ ഹോർമോൺ വ്യതിയാനങ്ങൾ ചെറിയ ഒരു കാരണമ‍ായി കരുതുന്നുണ്ട്. ടെൻഷനും പിരിമുറുക്കവും തലവേദന പ്രവണത കൂടുതകലാക്കുന്നുണ്ട്. തലവേദനയുള്ള സമയത്തു തലയ്ക്കു പുറമേയുള്ള രക്തധമനികൾ വികസിച്ചു നിൽക്കുന്നതായി കാണുന്നുണ്ട്. ഇതും ഹോർമോൺ അധിഷ്ഠിതമാകാം. ചികിത്സയ്ക്കായി വേദനസംഹാരി ഗുളികകൾ പലപ്പോഴും മതിയാകും. നൂതന മരുന്നുകളിൽ ട്രിപ്റ്റാൻ മരുന്നുകൾ ഉൾപ്പെടുന്നു. മാസത്തിൽ നാലു പ്രാവശ്യത്തിൽ കൂടുതൽ വരുന്നുണ്ടെങ്കിൽ തടയുവാൻ തുടർച്ചയായി ചില മരുന്നുകൾ ദീർഘനാൾ കഴിക്കേണ്ടതായി വരും പ്രഷറിനുള്ളചില മരുന്നുകൾ വളരെ ചെറിയ അളവിൽ പ്രയോജനപ്പെടാറുണ്ട്. വിഷാദ രോഗത്തിനു കൊടുക്കുന്ന ചില മരുന്നുകളും കൊടുക്കാറുണ്ട്.

പഥ്യം ചിലരിൽ പ്രയോജനപ്പെടുന്നുണ്ട് ചോക്ലേറ്റ്, ചീസ്, വൈൻ മുതലായവ വർജിക്കാൻ ചിലർ ഉപദേശിക്കാറുണ്ട്. കുറച്ചുനാൾ പരീക്ഷിച്ചു നോക്കുക. ടെൻഷനും പിരിമുറുക്കവും കൊടിഞ്ഞി കൂടുതലാക്കാം ഒഴിവാക്കാൻ ശ്രമിക്കുക.